تاتا..تاتا..!!
كان ياما كان..من أيام زمان..حدوتة ماما ستو عالغولة والغيلان..وحكاية جماعة قامت في لحظة كان الزمن نعسان..إتجمعوا وخططوا وزرعوا خلايا وانتشروا في كل مكان..كانت الغاية الكرسي والسلطة مهما كانت الظروف أو طال الزمان..نظرة فابتسامة على كام كلمة حلوة على حبة حنان..المهم يتسرسبوا تاتا تاتا جوه قلوب الناس بكام حديث على أيتين قرآن..وشوية كلام معسول على حبة حياء للتأثير على مشاعر المواطن البسيط الغلبان..رغم إن العبرة بالنية في القلب مش بالكلام وحلاوة اللسان..وبسم الله وماشاء الله في وقت بسيط إتغلغلوا في الشارع والبيت والغيط وكل مكان..كان الهدف واضح وحاسم هو غسيل المخ والسيطرة علي الشارع في كل زمان وآوان..كتاتيب ومعاهد ومشاريع خيرية وقوافل وعلاج بالمجان..معاهدات وتحالفات وإتفاقيات مع كل واحد يحقق مصالحهم من الإنس والجان..ولعبوا علي الأوتار وضربوا على نقطة الضعف في الحاكم علي مر الزمان..من أيام الملكية والطرابيش قربوا من كل سلطان بحجة البحث عن الأمان..العين عالكرسى والسلطة وجمهورية أو ملكية عندهم سيان..المهم وكلمة حق إنهم كانوا وقت الإحتلال للمقاومة أحلاف وأعوان..وشاركوا في مقاومة الإحتلال في القنال وتحالفوا مع شباب المقاومة الشجعان..ووقت الحساب إختلفوا مع صاحب الأمر وضاعت منهم المكانة والمكان..وعاشوا فترة عصيبة مشردين منبوذين وضيوف دايمة على الليمان..لكن الحال أتبدل ولعبت البلية وإبتسم ليهم الزمان من تاني ونطوا على النقابات والمحليات وانتشرت خلاياهم في كل مكان..وتوتة توتة إنتهت الحدوتة بالمنصة ورجعوا من تانى للسراديب زي زمان..واتسرسبوا من بعيد لبعيد وساوموا الحكومة ووصلوا بعد صفقة مفقوسة للبرلمان..زى ماقلنا التحالف مع العفريت والقرب من الكرسى هو المراد والهدف وصمام الأمان..ورجع الزمن من تانى وابتسم بفرصة ذهبية وعرفوا إنه خلاص آن الآوان.. والفرصة جاءت على طبق من ذهب وإبتدوا السيناريو لما وقفوا ينظموا المتظاهرين ويخططوا ليهم ويساعدوهم في الميدان..عاوز تعرف التفاصيل روح وأنكش في كتب التاريخ والزمن الماضى واللي جاى واللي كان..وقارن بالخطوات اللي بتحصل اليومين دول بعد الأمل ماتجدد وتحقيق الحلم بقى في الإمكان..التورتة تستاهل والفرصة مناسبة والكوادر موجودة من إسكندرية لأسوان..ياترى بكرة حيحصل إيه وفي الجمهورية الرابعة مين حيملك الشارع وإيه حيورينا الزمان..!! سبحان الله الناس دى رغم براعة تنظيمها مش بتتعلم من اللي فات..ناس بتعشق التخطيط في السراديب وتموت موت في المجادلة والمساومات..ناس مش واخدة على العيش في النور والحياه الطبيعية والإندماج في المجتمعات..ورغم إن الفرصة راحت لغايه عندهم علشان يبتدوا حياه جديدة ويقبوا فوق الأرض من غير محظورات..رجعت ريما لعادتها القديمة وشفنا أسلوب المساومة والمناورات..وشُفنا فجأه دهاليز وكواليس وفبركة سياسية وحركة مكشوفة وإنشقاقات..وحزب أنابيب مولود بالصدفة المقصودة وأخباره مالية الصحف والمجلات..في البداية اتعطفوا علينا بالموافقة على المشاركة السياسية والعودة من جديد للعبة الإنتخابات..وغيروا نسبة المشاركة وقلنا ماشى خليهم يبعبعوا عن نفسهم تحت شعار الشعب يريد الحريات..لكن السيناريو الجديد هو مشاركة حزبهم الوليد بنسبة غير نسبة إخواننا يعنى من الآخرزادت نسبة المشاركة وجمع الأصوات.. وأتاري القرار ده كان فاتح للشهية لباقي المذاهب والتكتلات..والكل خلاص قسم البلد على هواه وبقى صاحب حزب ومنبر وبيشارك في الحوار والندوات..ربنا يستر علينا من أصحاب الدهاليز والصوت العالي وكل ماهو آت..ياريت ناخد بالنا ونصحي لمستقبلنا ونحسب الحسابات..وزمان قالوا اللي يحسب الأصوات والحسابات في الهنا يبات..لو ماخدتش بالك من صوتك حيطير في لحظة وساعتها إوعى تندم على اللي جاي أو اللي فات..!! نظرية تاتا تاتا بيؤمن بيها كتير من السادة اللي لهطوا الثورة ولبسوا ثوب الثوريين..اللي أعلنها دينية واللي عاوزها علمانية واللي بيناور بأصوات المواطنين..خُد بالك وفَتح عينيك من اللى بيركب الموجة واللى بيبصم ويقول آميين..خُد بالك من صاحب نظرية فيها لآخفيها وكرسى في الكلوب واللى عامل فيها واعظ وأمين..فيه ناس عاوزاها على نار هادية وتاتا تاتا والناس نايمين..ربنا يستر علينا ويحمي مصرنا من أصحاب تاتا تاتا وتكون فعلا للمصريين..اللهم آمين…اللهم آميييييين..!! said_elmasryfahmy@hotmail.com
تاتا تاتا ine.com >onli
fiogf49gjkf0d
