لحد إمتى ؟؟ لحد إمتى حنقبل بالإهانة ..وكأنها حِتة مننا ..كأنها حِمانا إخواتي اللي جيتوا هنا ويانا .. خدعوكِ ازاي و فهموكِ انك في بلدك مش متصانة للدرجة ده ( مصر ) هانت عليكي .. وبقت الحكاية خربانة .. خربانة يوم ما قابلتكم .. وعرفت أنكم ( …. ) احترت أضمكم..و لا اصرخ واقول ” آه يانا” جايين تقولوا حكومة .. جايين تقولوا اعذرونا .. أصلنا شايليين كتير جوانا قلتُ لنا : ” منتوا مش حاسّين .. منتوا مش عايشيين هناك ويانا ” : ” انتو اللي متغربين .. متنعمين في الجنة .. واحنا هناك النار شاويانا ” طب كنتوا اسألونا قبل ما تيجو ..هي بصحيح ده الجنة؟ ولا الناس اللي جابونا خدعانا؟ خلاص .. مش سبتوا النار .. و دخلتوا الجنة معانا ؟؟؟ اقولكم بقه ع الحقيقة .. على نــار تانية جوانا ؟؟؟؟ على طوق غربة ..حبسانا وخنقانا على عنصرية .. قاسية .. متحسيش معاها ( مهما عملت ) غير بالمهانة دكتورة ؟..مهندسة؟ .. فوقي يا حبيبتي .. حيقلولك ” انتي مصرية .. مش فارقة معانا ” زمان كانوا و كنا .. بس دلوقتي أعترف إن كفتهم بقت هي الكسبانة 140 دينار .. مبلغ بصحيح يخليكي فرحانة ؟؟؟ طب شوفي بقه معايا و اعرفي حقيقة الدنيا اللي وخادانا .. 20 فتورة تلفون .. 30 أكل و شرب ..20 مصروف.. يبقى صرفتيلك كده سبعيناية وبقيلك كمان سبعيناية ..عارفة بقه يا حلوة تعملَّها كم السبعيناية ؟؟ 1337.86 جنيه اللي حتبعتيهم لأهلك .. بذمتك مستاهلة الحكاية ده طبعا لو كانت مصاريفك زي ما قلتلك من البداية يعني بند ( التحويش ) تنسيه للنهاية ناوية تقعدي قد ايه ؟؟ سنة .. عشرة .. ما تخليكي يا شيخة احنا ايه ورانا بس حطلب منك طلب بالامانة : إياكي تقولي أما أجبلي حته هدمة ..خليكي باللي عليكي ..ده انت وراكي هناك ولايا و إياكي تشتري لولادك هدايا .. خلي بالك !! كده حتطير السبعناية وإياكي تقولي في وسط المشوار “إلحقوني أنا زهقانة..ولاَّ قرفانة ..ولا حتى طهقانة” و إياكي ولادك و جوزك و أهلك يوحشوكي و تقولي .. ” يااااه .. أنا بجد تعبانة ” و إياكي عينك تدّمع و تقولي .. : يا خسارة .. انا فعلا غلطانة ” و إياكي جسمك يوجعك و تقولي : ” أنا طول النهار شقيانة ” و إيــــاكي تقولي ” مصر وحشاني ” .. ده انتي اللي عملتي ده أكبر خيانة متسأليش .. الجو هنا عامل كده ليه ؟؟ ..الله على نسمة هوانا و متسأليش.. الناس هنا باردة كده ليه؟؟ .. الله على دفى سمانا و متسأليش .. أروح فين ولا أجي منين ؟؟ هنــا محدش معانا و متسأليش.. أنا بتشتم كده ليه ؟؟ انت اللي رضيتي .. -فإنسي خلاص انك انسانة- ده رسالتي ليكي .. يا اختي يا حتة مني و نفسي .. و كلي .. افهميني و اعرفي انا ليه محروقة من جوه و بجد .. بجــد زعلانة إسألينا إحنا المتغربين .. إحنا اللي دقنا المرار و صبرنا .. و قلنا ” كلها كم سنة أحوش كم قرش و انا الكسبانة ” سنة .. عشرة .. بس للأسف الدنيا زي ما وخداكوا وخدانا شتيمة .. نظرة .. قرار وزاري .. عنصرية .. احتقار.. و بردوا قلنا مش فارقة معانا أكل العيش مر .. نستحمل أهي – والسلام – شغلانة متفكريش إنك حتبني قصور .. ده انت يدووب تحاولي مترجعيش خسرانة عاوزة تتغربي ؟؟؟؟.. أرجــوك .. اتغربي من غير مهانة لكن لحد انك تشتغلي ( ……. )اسمحيلي اقولك انك ” خسرانة.. خسرانة.. خسرانة ” مش عارفة ارفع راسي بين الناس .. انت السبب .. خليتي ناس متسواش فيّا شمتانة حد يجيب العليـــق .. للريحانة حقك عليا يا مصر.. احنا فعلا ظالمينك معانا لكن يا حبيبتي حتفضلي _ غصب عن الدنيا بحالها – .. زي ما سماك النبي – صلى الله عليه وسلم -.. أرض الكنانة
اختكم – بنت مصر – / أسماء أحمد البربري
اختكم – بنت مصر – / أسماء أحمد البربري
