محمد حسني يرد على رسالة شيماء: كنتي بتتمني رد مني .. طيب يا ترى هتردي عليا.. لو الثورة كملت مكنش اللي زيك في القبور
حسني: حاولت عيني متشوفش كلامك .. قلبي انفطر من اللي كتاباه .. ومن اليقين إن مستحيل تردي عليا
كشف الناشط محمد حسني – الذي شمله العفو الرئاسي الأخير- إنه بعد خروجه فوجيء برسالة من الشهيدة شيماء الصباغ خلال فترة حبسه تعبر فيها عن حزنها لحبسه وأنها تنتظر رسالة رد منه .. شيماء التي ظلت في انتظار رد محمد استشهدت خلال مسيرة حزب التحالف في ذكرى الثورة قبل خروج محمد بـ 9 شهور كاملة ودون ان تتلقى رده على رسالتها.
محمد الذي لم يكن موجودا ليرد وقت إرسال شيماء لرسالتها لم يكن أمامه إلا الرد على رسالتها برسالة يدرك أنها لن تتلقاها قال فيها :” كنتي بتتمني رساله رد مني وده كان ممكن .. لكن انا اللي مستحيل الاقي رساله رد منك ، احساس العجز المر اني اكون مسجون وصديقتي الحبيبه تموت … واتحمل ده !
وإلى نص تدوينة محمد حسني التي كشف فيها عن رسالة شيماء :
بفتح الانبوكس وبرد علي كل الناس اللي بعتت ليا الرسائل طوول سنه ..
لاقيت رسالتك وانتي بتقوليلي انك مضايقه وعارفه اني مش هرد … طب اديني برد اهو !! هترد عليا !!
اديني طلعت بالسلامه .. وانتي للي روحتي فين !
اتفقنا في اخر حوار ان الثوره مكملتش ….. وانها هتنتصر لامحاله !! ما استنتيش ليه ولا هي مش هتنتصر .
هقولك زي ماقولتي معلش ماهي لو كملت مكنش اللي زيك في القبور والكلاب في القصور . الكلاب قتلوكي .
كنتي بتتمني رسالة رد مني وده كان ممكن .. لكن انا اللي مستحيل الاقي رساله رد منك ..
رسالتك ديه خلتني اتمني البقاء في السجن ارحم .. لاني محتاج صبر فوق طاقتي .. حاولت عيني متشوفش كلامك .. قلبي انفطر من اللي كتاباه .. ومن اليقين ان مستحيل تردي عليا.
ربي هبني القدره علي الصبر .. اللهم ارحم شيماء رحمه واسعه .. الصبرمن عندك يارب .
#شيماء_الصباغ
#شهيدة_الوردة
وكان قرار قد صدر بالعفو عن مائة من الشباب المحبوسين بمناسبة عيد الأضحي المبارك، من بينهم 16 فتاة، ومن الصادر بحقهم أحكام نهائية بالحبس.
